Rev 18 | ASO | STEP | Neloti' nene angelo' gohi ma Okulumokuti' lemo navo ninguve. A'mine angelo' nene amuzo naba do minosa nolimivo ei' labana've ne'mo misubo nene hize labana' elo minine' ve.

Revelation of John 18

Numuno Ebe' Naba Babelonia Nene Sime' Naavo Evene' Ato Ato' Muki' Nete Ningi Gili Mulumo Gili-di Ive Nama Igi Gamazi Lani' Gamazi Zohane' Gizine'

1 Neloti' nene angelo' gohi ma Okulumokuti' lemo navo ninguve. A'mine angelo' nene amuzo naba do minosa nolimivo ei' labana've ne'mo misubo nene hize labana' elo minine' ve. 2 Ne'mino mino aza nene nolo nabauti' vise lo ti' lo line' ve:

Amuzo veti numuno ebe' dizo minine' ado' Babelonia numuno ebe' ma nene
mo sime' nave.
Ee, a'mine numuno ebe' nene sime' nosa mo sikalahu' golosoliti numu'ine
lolo' ogave.
A'mingu' nene sikalahu' goloso ato ato' muki' ingi monaa' navo
ido' nama goloso ato ato' muki' nesi nene ingi monaa' navo
loposo nite' goloso ato ato' gosele' asele' inite' muki' nesi nene
ingi monaa' nave.
3 Ne nanitekumu' ve. A'mine pasidia' vene' ne'mo
lanite' gelaa' ine' monovo goloso vaini noso ne'mino minine' nene
evene' zuho ato ato' ngemavo ezesi maka' a'mine vaini noso nene naa' ani' ve.
Ido' misubou' misubou' guve'inesi ve naba' naba mini'mi monave ingine nene
a'mine pasidia' venekisi maka' monovo goloso iga' ani' ve.
Ido' aza inite' matakumu' amuzo molo lanite' gelaa' ine' nenako
ne'mo ezeloti' nene misubou' misubou' bisinisi iga' ave nene
moni heneni ve lili' ikeve.
Nemu' nene a'mine Babelonia ebe' nene mo sime' nani' ve.
4 Ne'mine lavo neloti' nene Okulumokuti' nolo gohi ma soto' ogo ti' lo nolivo giluve:

Neze zuhokizo,
lingine nene a'mine Babelonia alevete lihime daa' nani' nene maka' dikevo
naza lihime ngemo do goloso o-ngedeloni' inite' ato ato' nene
lengikisi a'mine'mine ogo do soto' o-lengedaloze.
Lingine huli-ngidi abazakovo' vi minilo.
5 Naza lihime ngemelesuve noluvoni' nene
engi' lihime'ine nene eheto' eheto' mili'mi dizi vani' nene mo Okulumokisi
do gelo neivo
O'moso ne'mo a'mine goloso nite' dani' nemu' gala nogiline' nenako
nemu' nene noluve.
6 A'mine pasidia' vene' ne'mo evene' do goloso o-ngidine' nene
nadi' nadi' ogosa o-ngede nolihe
a'mido' golo hizi a'mine numuno ebe' nene di goloso i-dilo.
Ee, a'mine ei' ogo molo o noline' inite' goloso hamo hamoto' nene
seta seta' di lobe' lobe' igisavo' lihime imilo.
Ee, a'mine ei' monovo've goloso ado' amuzo malehe vaini noso ne'mine
kapuu' lepo ngeme noline' votigile nene ivile' ivosa
vaini noso nene gohi masi di amuzo mili lepi imilo.
7 Aza nene ei' oko'no do dizo mino oko'no'mo lanite' giline' monovolokovo'
geli geli ogo do'mo vo mine do dizine' votigilelo' nene
di milisa di'mi limi-di mulumo alumo gelaa'
ido' mulunou' mulumo alumo gelaa' ilido' di mili i-dilo.
Aza nene lulou' ti' lo laa' neive:
Naza nene guve'nesi vene' dizo nouvoni' vene' ma nene nouve.
Evene'ne zuho ngeli ma hilamilisanako ngelo mulumo alumo gelo ma minamolosuve.
8 Ne'mine laa' neine' nenako
ido' eze lihime emelive Guvelesi ve O'moso nene amuzo ve neine' nenako
nemu' nene gamene hamokukovo' a'mine vene' di goloso i-dilizani' inite'
goloso ato ato' soto' i-dilisave.
Ado' inite' gize daa' monovo soto' o-deleseive.
Ido' mulumo alumo soto' o-deleseive.
Ido' ga'na naba soto' o-deleseive.
Ido' olo' ne'mo nene lovo' lovotevo' o-deleseive.
9 Misubou' misubou' guve'inesi ve vai' mini'mi monani' ingine a'mine Babelonia numuno ebeto' medelo minine' pasidia' venekisi maka' monovo goloso igi oko'ine'mo lanite' giline' monovo ato atokovo' igi mili minaa' ani' nenako a'mine numuno ebe' Babelonia nene ololi'mo lovo' lovotevo' neivo liline' sokile've nene a'mine guve'inesi ve ningi a'mine aleve mulumo alumo nigilani' nene lazasi gelalone li golise gilisa mini hoto' igi mini zanamana izi ive nama i-ngidi mini ti' li lilisave:

Agae, agae, numuno ebe' naba ma lae.
Amuzo veti numuno ebe' Babelonia ma lae.
Mo gamene hamo' maukovo' O'moso'mo lihime gimine' nene
mo mulumo gele-gedekune.
11 Ido' misubou' misubou' bisinisi iga' ave nesi a'mine numuno ebekumu' nene mulumo gili ive nama i-dilisave. Ee, ingine maketi milaa' ani' inite' ma nene meni gohi ma hizamilisanako nemu' nene mo ive nama i-dilisave. 12 A'mine evenelite maketi milavo meni hizaa' ani' inite' nene ado' ngolidunu' lili' ani' inite' nehe ido' siluvadunu' lili' ani' inite' nehe ido' geheni lamine tamine' nehe ido' ngalulu' lamine' goloso nehe ido' amuzo malehe lavolavo lamine' nehe ido' lavolavo gumi kala pepoli ve laa' nanikisi ido' gulehe' ngenge'nisi meni've dizo minine' lavolavo nehe ido' silika lavolavo nehe ido' luhuvo lahava minine' palani za lamine' ato ato' nehe ido' elefaniti ve'ine gavulo nabadunu' lili' ani' inite' ato ato' nehe ido' meni've dizo neine' za laminedunu' lili' ani' inite' nehe ido' ngoli gele vine' initetunu' lili' ani' inite' nehe ido' ainidunu' lili' ani' inite' nehe ido' mokono' geheni laminetunu' lili' ani' inite' nehe 13 ido' unuvo laminekisi uveli ato ato' nehe ido' oloku' gizikevo unuvo lamine' oga' ine' inite' nehe ido' za setalitisi novozo unuvo lamine' oga' ine' nehe ido' vaini noso nehe ido' oko'nido' hilaa' ido' noso' nite' gizi vata' iga' ani' uveli nehe ido' sikoni beki, viti beki nehe ido' bulumaka' ize, sipisipi ize, hosi ize nehe ido' hosilite gelelehe' iga' ani' kali nehe gonolo' ve ado' vo'inehazasi minani' inite' evene' nesi inite' muki' nene maketi milikevo meni hizaa' ani' ve.

14 Ido' evenelite a'mine numuno ebekuti' alevemu' ti' li lilisave:

Inite' lamine tamine' lutingu' dalisa gilani' ma nene
mo lengi' nizadati' vo haha ogave.
Ee, a'mine ngomo' naba' noso' nite' lamine tamine' vai' nesi
ido' gulehe' kalehe' inite' lamine' tamine' nesi
lengitati' nene mo vo haha ogo osu' loganako lingine gohi ma ningamilisave.
15 Ido' misubou' misubou' bisinisi ve a'mine me'mine inite' lamine' tamine' maketi mili a'mine pasidia venetati' moni di heneni ve lili' ave ingine a'mine Babelonia aleve mulumo alumo nigilani' ne'mino lazasi gelalone li golise gilisa mini hota i mini gisi ngisi mili ive nama igi 16 ti' li lilisave:

Agae, agae, numuno ebe' naba ma lae.
A'mine numuno ebe' meve nene vene' ma genegana gulehe' ngenge'nisi
ido' gumi kala pepoli ve laa' nanikisi minine' meni've dizo minine' genegana ngolo mino
ido' gonolise've ato ato' meni've dizo minine' inite'
ado' ngolidunu' nehe gulehe' kalehe' gehenidunu' nehe
ido' ngalulu' laminedunu' nehe
nevo'mine initedunu' gonolise ogosa minine' vene' gele vine' numuno ebe'
Babelonia ma laee.
17 Heneni nganenika atoli'mine ogosa minine' ma nene
mo gamene hamo' maukovo' hede gudi vogangumu' nene mo mulumo gele-gedekune.
Ido' sipilo' gizebo vesi ido' a'mine sipiu' ebe' mala vilisa nivani' alevesi ido' sipiu' bosukulu nesi ido' guvo nosoloti' bisinisi lili' igi inite' daa' ave muki' nesi nene mukito' mini hoto' igi 18 a'mine Babelonia numuno ebe' nene ololi'mo lovo' lovotevo' neivo a'mine noline' sokile've nene ningi geke' geke' li ti' li lani' ve: Agae, a'mine numuno ebe' naba me'mine nene mo ma nomine' ve. 19 Ne'mine lii u'musupo gisi godo'nido' hiliisa geke' geke' li gisi ngisi mili ive nama igi ti' li lani' ve:

Agae, agae, numuno ebe' naba ma laee.
Guvo nosolo' sipi di monave muki' nene ei' a'mine numuno ebe' Babelonia
nelati' heneni nganeni di moni' moni' igi moni heneni ve lili' iga' ani' maho.
Idise nene mo gamene hamo' maukovo' inite' muki' nene tava li di hulikevo
mo golosolo' molavo mulumo gele-dekune li lani' ve.
20 A'mine aleve nene mo ne'mine igi goloso ikeni' nenako
Okulumoku' nizave lingine longolize izi minilo.
Ee, lengi' di goloso i-lingidaa' ani' mamu' nene O'moso'mo gonito' hize ele' o-lengedo
a'mine aleve nene lihime ngimine' nenaze.
Nemu' nene O'moso'mi evenelesi aposolosi ido' polohete linginesi nene
longolize izi minilo.
21 Ido' neloti' gohi ma ninguvoni' nene amuzo malehe angelo' mali'mo geheni naba' naba ma ganadise geheni ne'mine nene ma do oto hulo guvo nosou' ogo ti' lo line' ve:

Babelonia numuno ebe' naba ma nene ne'minisa nene mili hulikevo
evenelitesi nene gohi ma ningamilisave.
22 Ido' a'mine numuno ebe' Babelonia neke, geiku' nene ngita gele vine' inite' hapu nibilavo nehe
ido' musiki nimilavo nehe ido' huhunale' nimilavoo nehe
ido' pikuli hubu nilavoo nehe ne'mine mana'mine naavo
nolo've nene keke' gohi ma gilamilisave.
Ido' ato ato' gono mukili'mi gonou' ve nene gohi ma mini-gidavo
ningamilisave.
Ido' viti gihile etaa' neine' masini ne'mi nolo've geiku' nene
gohi ma molavo ma gilamilisave.
23 Ido' lamu'mi livi' labana've nesi nene geiku' livoo mo ma ningamilisave.
Ido' vene' alu hizaa' vene' daa' niigi ngolize izi nama gaha nilavo
nolo've geiku' nene minivoo ma gilamilisanako mo osu' loloseive.
Nene nanitekumu' ve.
Geitati' bisinisi iga' ave nene misubo lingela minave ngivile' igi
evene' naba lili' ani' nenako nemukisi
ido' evene' do goloso o-ngedaa' monovoka golosodunu' evene' zuho ato ato' nene
go'ine izo ngele'mize gopo aine' nenako nemukisi nene sime' nalosane.
24 Ido' a'mine Babelonia numuno ebeku' aleve
ado' O'moso'mi evenelesi polohetesi ngibili hilikevo vanise'ine lepani'
ne'mi lihime nesi ido' misubou' misubou' evene' ngibili hilika' hilika' ani'
neti lihime nesi nene mo engita soto' neinako mo sime' nalisave.